2018年11月26日 星期一

【幼稚園小學分析】2019小一自行失敗點算好? 之後點步署??

自行失敗點算好?
我地到而家都仲好記得我地小一自行失敗既心情~
回想知道自行失敗結果之後, 幾晚都失眠,
成日都唸點算好?  
若果到今日呢一刻都未有任何一個小一Offer 既,之後點步署?? 

國皇之家生活事希望以過來人身份/自身家長經驗鼓勵一下大家~
首先要想同大家講政府話44%學童獲自行分配小一學位,
成功率7年新高 !!

真實情況真係有咁理想咩!!?? 

花生家長: 「政府咪講左有44%..都幾好啦~咁都派唔到既......你哋梗係揀咗啲名校啦!」😡
今時今日唔好計熱門嘅一線學校,好多家長為左唔想玩大抽獎
二缐頭既學校都已經爭崩頭😱
20分都唔敢博D太熱門既小學
而且聽過一D 朋友Case , 今年個個都知道小一少咗小朋友申請
 反而仲進取左,15分都唸住"偷雞" !!
上幾年15分係注定要陪跑!!

全港各官立及資助小學將於下周一(26日)公布2019年9月入學的小一自行派位結果,教育局指今年有51,460名兒童申請,當中有22,702名兒童獲派此類學位,成功率為44.1%。其中共12,055人屬於有兄/姊在該校就讀或父/母在該校任職類別,即「世襲生」,而10,647人則屬按「計分辦法準則」分配類別,比率分別為47%及53%。

==>基本上五萬人入面有12055 人係必收生,
政府專登整大條數,真係以計分又入到既機會率係
得 "27%" 架咋。
 [10647要計分生既小朋友 / (51460 全小一生-12055 必收世襲生) ]
25分差不多必入,自行20分大約五份一機會架咋
無關係/無宗教分/ 15分果D,係成個教育制度下好多一開始已經陪跑多 !
<入正題>
=========================================

【小一自行失敗點算好? 之後點步署??】
1. Plan for the worst !! (Pray for the best)
2. 了解自行分配學位 超收情況
3. 主動尋寶 
4.好好裝備自己準備叩門 !!
5.進攻定保守?小一統一派位填表策略 
6.與小朋友同行,不要說負面說話



1. Plan for the worst !! (Pray for the best)
呢個相信好適合小一自行失敗15分+5分宗教分(20分)既家長🙏🏻
無論大家咩宗教好,今晚開開心心同屋企日出去食餐好既,
聽下音樂同D有實際經驗既家長傾訴一下
計下仲有幾剩多% (機會率)仲實際,逐間逐間計下,
個心真係會舒服D架~
音樂椅仲未停,最差情況去到下年九月頭都仲有得大執位,
只要未到開學日都仲有機會架。
千奇唔好咁快放棄,去到下年既6月~9月直資/私校又有一大輪<放位>熱潮 !!
到時留力再戰/再叩門啦~


2. 盡快了解自行分配學位 超收情況
若果日日以淚洗面,個心入面係咁問點解人哋有我冇位?
阿邊個邊個 3 姑6婆都搏到啦!
人哋得點解我唔得?大家都係15分或者20分😖

不如盡快了解之後仲有幾多位比大抽獎,仲要睇埋其他學校 !
今年比世襲制"食"左幾多位又要同另一半傾下仲係咪以三劍合璧"1-1-1" 計劃行到尾 ?!
其中最快既方法係記得睇埋其他網站整理好既




【2018/2019小一自行派位】收生情況



圖片來源:Reference HK01

有晒上面啲超收數據先遲D先可以幫你選擇到
大抽獎既"甲部" 或者 "乙部"
仲有個少少Tips , 有D學校仲會有D知道自行有幾多人揀左佢
e.g. 睇"本校"申請既Application Number 
"估下"就會知遲D 1-1-1 有幾多"對手"

大抽獎無左差不多一半既學位
假設有357 人申請自行第一個"1"
仲用1-1-1 策略就有點兒"博"啦

失敗既機會其實超大

(111 唔係一定既)


3. 主動尋寶 !!  

下一個Stage 就係既大抽獎 !!!叫大家一開始揀"寶校"當然唔甘心,

不過好多時寶校都係人夾人 !!有D"寶校"都唔一定係差架!!

(正如有D聲稱係Happy School 讀到落去都一D都唔Happy !!)

一樣都係勁多功課,

一間近屋企既/但係設備係千禧學校(校舍) 既寶校總好過三唔識七路程又遠寶校 !!

一間寶校亦總好過一間"有時限學校"(短名學校) !!!

大家呢星期都可以考慮一下,認真去瞭解吓網內既其他唔係熱門既學校~



(呢招只適合怪獸家長)

4.好好裝備自己準備叩門 !!

若果到今日呢一刻都未有任何一個小一Offer 既,

剩低落嚟嘅兩關 (1)大抽奬同埋(2)叩門!

大抽奬講運;叩門係講實力,

同小朋友嘅學術能力有直接有關係嘅要喺幾百人之中脫穎而出,

其實一啲都唔易。若果覺得唔甘心既? 就努力去"谷"學術啦~

一直都同大家講幼稚園與小學"斷層"無限Loop 問題,

小朋友接受到而家長又配合到嘅話,執靚個Portfolio /個人檔案

早D準備仲可能趁呢半年係大叩門日叩到多一個小一學位返黎~
下面呢篇blog有講多少少

而家唔係叫大家走去報咩班
若果家長係一直都無準備, 一直都隨遇而安既家長
麻煩都一直都Happy 到尾
唔好到"大抽獎"失敗先黎問點算好點步署??

我相信呢個世界唔會所有人都咁幸運
有人歡喜有人愁有好彩的,總有不幸
教育制度一早定左係咁想唔玩都唔得 !!
承受唔到就唔好搏咁盡!!或者好好準備自己
我地實際例子見好多人K1/ K2 已經準備今日

**機會學位只留比有準備既人!!**

5.進攻定保守?小一統一派位填表策略 
自行失敗一下Part 就係大抽獎"統一派位"
一直都無咩谷開既,今年我係建議大家而家都未有Offer 既都係唔好咁搏,
唔想超級寶校或者Band 3 學校,
雖然人少左,但都要"保守", 再預備叩門!!
而我地會建議大家填埋"甲乙"...
之前既blog都有講過點解~

Reference :小一統一派位填表策略 (進階篇) - 填甲二/乙二/叩門成功率注意事項

6.與小朋友同行 不要說負面說話
呢一刻自行成功又好失敗又好..
都希望大家可以都放鬆心情先
最緊要夫妻間有共識,唔好互相指責,
最緊要係既係唔好指責小朋友 ~

係小朋友面前講一D負面既說話!!
過來人經驗同妳分享我當時都有係小朋友面前講

"再唔努力,遲D你無書讀架啦"
"再唔努力,遲D你去一間唔知咩學校架啦~"
"睇下你啦~ D 連上天都唔幫妳啦`"
大家千奇唔好比呢D負面情緒影響到,係現行成個教育制度..
同小朋友自身既習能力係絕對"無"關既~
叻D又係計分 ; 唔叻既又係計分
大抽獎一直都係一堆無意義既數目去"抽" !
而定要叩門/小一面試大部都係"小學化".絕對係.唔難唔考 !!
跟本就唔係正常幼稚園K3學生可以應付既題目~
佢地唔識好正常~

若果真係要怪,要怪就怪自己 !!

之前有句名言"贏在射精前" 父母好應該去識返個讀名校生另一半,
(或者申請去做校工- 在該校任職而必獲取錄),
<--不過以上既都係講笑咋~
無關係無分係自行階段係無野可以做到架~


最後
因為而家少左好多私人時間,到時未必有時間update fans~
希望父母們同小朋友j都要準備長期戰鬥既心態 
都要好好保重身體呀 !!
放棄好/進取好....
呢一場係長期持久戰
大家都唔好睇得太重,
距離下年9月開學仲有好多時間,
考學校雖然重要,不要過份操勞同擔心 


可以咁唸, 最少仲有有一半人(100- 44%) 同妳一齊玩大抽獎

You're not alone💪🌈

可能妳心儀小學未出現呢??
最緊要係與小朋友同行
佢地都明白父父母既苦心~

遲下再寫下
《升小及幼稚園大作戰🌈家長如何制作Portfolio ⚡️⚡️》
制作 Portfolio 既要點🔥及建議 

沒有留言:

張貼留言