2016年11月2日 星期三

小一面試之最 (報名篇/簡介會篇/面試篇/號外篇)

今日有媽咪 forward 咗以下一個家長心聲,可以同大家share
呢個Post 有個好正既小一直資/私位面試Summary
我地都唔係間間去晒..呢位媽媽直係好犀利~
對於過來人既我地,間間都有D特別既回憶
好似培正...一路排就一路鬧仲咩唔上網
又好似英華面試...Mancent 係笑住咁出返黎

Blog 底仲有其他學校面試考D咩/面試模式
大家有時間都可以參考一下


資料來源:Edu Kingdom / Whatsapp 
作者:Joyce NgYY


我見大家都差唔多完成了大部分直私面試,想開一個輕鬆topic大家分享吓… 綜合自己及各方好友今年考小一既經驗,得出以下結論… 不過要聲明一下,無意針對個別學校架,不喜勿插﹗

報名篇︰

1. 最簡便 - St Paul Boys
呢間應該係我印象中唯一一間可以完全網上攪掂,用Visa即時比埋錢,仲要唔洗再郵寄任何文件既學校,值得一讚﹗而且亦好體貼地為那些不能網上交表既人,可親身到學校交亦得。

2. 最old school - 培正
今時今日仍然堅恃傳統要先寄去索取表格,等佢寄比你,然後再親身交form既學校。

3. 最先進 - TSL
佢地網上系統真係好完善,有學校自家Apps 之餘,網上一交完表已立即更新你交表既status 落個PDF 度比家長參考,而且有QR Code比你去便利店交錢,甚至親身去交文件時,大堂個screen顯示輪侯號碼同服務櫃檯,令我以為去咗某電訊公司既service center﹗

4. 最體貼 - 褔建附小
可以係網上比家長揀時間interview,雖然培僑,CKY都可以,但褔建附小揀完後侮都仲比改,抵讚﹗我亦十分欣賞佢勇於挑戰學校既system loading,明知10月8日有差唔多10間學校面試,包括佢地,都夠膽比人以first come first serve 形式網上揀時間,結果係點?個system唔洗幾分鐘已經…

5. 最墟冚 - SFA
並唔係因為佢報名人數最多,而係佢得一日收表,兼得一日面試(係最多學校面試嗰日),學校又要好大方咁話比大家知,依傢交表係會幾點in,結果攪到學校核心外圍充斥住大量家長,每人都手持一份野(form),又不時講電話報告現況,唔知既話以為去咗投注站門外﹗

6. 最神級 - SPCC
佢神級到一個地步係,係你收到面試信既一刻前,都唔能夠確定邊幾日係面試日期,但當你收到信既時侯,不足一星期已要去面試,仲好可能係閒日… 不過即使係咁,大家仍然心甘命抵,絕無半句怨言。另外,我相信佢好有可能係唯一一間面試會蝕錢既學校,因為佢除咗唔收報名費之外,我相信俾咗留位費,但最後放棄唔讀既人應該係寥寥可數既。

簡介會篇︰

1. 最有娛樂性 - YW
呢點都唔需要我多講,Snoopy 校長講talk 既能力,不用置疑。但其實播道校長亦唔差架。另外有個攪笑位係優才個簡介會好強調係嗰度教書係筍工,攪到我想轉工多過幫阿仔報小一咯。

2. 最落力 - 啟思
個校長幾乎全場由頭帶到尾,2個多小時,仲要每場面試又重頭講一次。

3. 最容易登記 - 真道
呢間係印象中要爭得黎,個system又頂得順唔冧既,其次係YW,最難既應該要數播道。不過又有啲學校簡介會唔洗點爭都有,如救恩,SMC等。

4. 最難爭 - 港同,男拔
港同係抽籤既,聽聞有人用7個名去抽都抽唔到1個。至於男拔,也不用多說,年年都有人通宵排隊聽第一場,但最有趣係相差2個小時既第2場,係唔洗點排都有得聽架﹗

5. 最敢言 - 救恩
救恩校長敢作敢為相信大家係佢決定退出TSA已可見一斑。我好喜歡校長一句「唔明點解啲學校要in 2,3 輪,又要見家長,難道你地(家長)會講一啲我唔啱聽既說話?點解要大人細路都辛苦?我唔係好得閒花太多時間去面試架咋﹗」真係要比個like 佢﹗

面試篇︰

1. 最快手 - 禮賢,SFA
史上最快,只要見小朋友15 - 20分鐘已可揀出學生,勁﹗另一間SFA,可以係短短1日,朝9晚3點半,見哂接近三千個學生,效率都好高。

2. 最淹悶 - SMC
呢間係一路收表(收足半年),一路面試,又陰啲陰啲出2nd in甚至offer既學校,但如果未被甄選既,可能等幾個月都無聲氣,連想知幾時會有結果都唔知﹗

3. 最估唔到 - DGJS
呢間面試題目真係無得tip,連摺衫去廁所都考埋,估你唔到﹗

4. 最巴閉 - 高主教
所謂巴閉,係面試當天,差佬封路封到連學校條街都唔比駛入。

5. 最有娛樂性 - YW ,CKY
YW 家長係等侯期間,仍然有Snoopy校長同YW仔表演娛賓,小朋友走既時侯仲可以比$100拎走架飛機,CKY則有副校長表演棟篤笑,另外優才有吹氣彈床比小朋友玩亦抵讚。

6. 最辛苦 - 男拔
面試要先帶小朋友排隊上山,之後家長要落山等候,再上番山接番小朋友然後落山,最開心既應該係附近茶餐廳。

7. 最爽快 - 港同,漢華
港同 In 完一星期已出result,唔洗左等右等,輾轉難眠﹗(多謝 winy629提供) 漢華都好快,三星期內已經完成 1st IN, 2nd IN, offer, 註冊。

8. 最有宗教氣氛 - 音小
呢間面試要同老師一齊祈禱已不是新聞,但原來我番邊間教會,做過咩事奉亦會被問及…但奇在佢地又唔係話一定要收基督徒,咁唔知其實有咩關係?

9. 最老友鬼鬼 - 真道,優才
呢2間學校不單只係正隔離咁簡單,就連interview既日子都有部分重疊,攪到好多人搭的士見到有人落車又跟住落,先發覺去錯學校﹗又有啲好彩既真係可以in完一間行去另一間in埋架﹗最攪鬼係佢地2間學校都鍾意係non office hour出email 比家長,莫非2間學校夾埋既?

號外篇(金句摘要)︰

1. (YW門外)阿仔,點呀?In 成點呀?有冇問你時事題呀?無?咁有冇問你關於奧運既題目?又或者司長個名?吓?真係冇?

2. (SFA 交表門外,男子手持電話講緊︰)交咗喇,in 2點半呀… 吓,咩話?撞咗陳守仁?唓,我點知咁多啫,你又唔早講…

3. (朝早7點搭緊的士去男拔聽簡介會)司機叔叔,唔該男拔門口呀… (到亞皆老街見唔到龍尾時)司機叔叔,呢度有落得架喇(滴汗ing)…

4. (係SFA面試期間)你呢度係第幾場呀?我第3場架喇﹗今朝一早去咗男拔,之後飛的去咗St Paul,再飛黎呢度架﹗

5. (係高主教面試期間,有家長call的士)係呀,我想由高主教小學去石門(WKF)呀,行邊絛隧道?冇所謂啦,最緊要快﹗

6. (係DBS排隊等 in 期間)小朋友問媽媽︰呢間係咩學校黎?男拔會唔會見到林校長架?點解只係得男仔in?咁啲女仔去哂邊?唔… 但我最鍾意都係英華﹗

7. (YW出1st in result)老公,你對清楚啲啦?咩話?471 同 473 都有,係冇472?(號碼因私隱關係,係我作出黎的。)

8. (10月20日知道第2日多數掛8號唔洗番工時)嘩,正呀,聽日可專心上網check result 喇﹗(第一次唔係諗節目去玩…)

如有雷同,實屬巧合。

好多學校都會問呢條問題~


為何你認為你的小朋友適合我們的學校?



2017/2018年度直資學校學費List



==其他升小大作戰既blog==

英華小學真.面試考D咩?

求位信既內容可參考呢篇blog
咩Offer都冇點算好? 求位信範本(唔係Badykingdom Sample)
小學制度計分詳情
2016-2017全港小學排名(Top 50) + 2015 全港升中派位概況
珠心算/學林數/奧數/公文數/學林數學揀邊樣讀好?
熱門模式題目例子
數學興趣班+ 宣道小學面試內容

各區熱門官津小學(加仲有幾多個統一派位學位配額?)

宣道小學面試內容

沒有留言:

張貼留言