Adsense Script

2019年7月22日 星期一

【香港最黑暗的一日】


香港由5月尾開始,發生連續出現反送中抗爭運動,
國皇之家生活一直身體力行支持及參與其中。




近日的確有很多流言,人心惶惶,

我地遊行時都聽聞話元朗有人準備打黑衫人,叫大家唔好著黑衫,帶小朋友快D返屋企。
永勝文迪都以為係流料,直到尋日睇新聞⋯⋯


但尋日(21.07.2019)所發生既事,我覺得大家係有需要比壓力政府公開解釋及執法,立即拘捕元朗暴徒!


在元朗發生的集體傷人及無差別襲擊,
完全針對普通平民及地鐵入面既無辜乘客 !
直播睇到記者俾人圍毆,包括沒有攻擊性大肚婆\小朋友\老人家都照打;


事件亦維持長達數小時,而警察只係佢地隔左兩三個鐘先到現場。

事件實在令人髮指,人神共憤。而現時政府到現時為止,


都只是發了一編企圖混淆視聽的新聞稿,開左一個講左等如無講既記招 !


一國兩制「至為重要」!! 


政府以圖將元朗襲擊「僅視之為有人受傷的私人糾紛」


今早小朋友睇新聞都問我地,警察仲咩唔救佢地既?我地都唔知點講??


所以唔好以為唔理就會無事,

今天發生在元朗人身上,

明天就可以發生屯門荃灣!

後天就可以發生在妳屋企既地區,


我地既香港搞成咁,真係可以視而不見不理咩?

明白大家都各有政治立場,大家亦不一定要為事件表態,

但經過政府一再無視民意,警方選擇性執法...
而家已經唔係咩派別,咩陣營問題,而係良知問題🔥 


做得我地既Fans,大部分係有小朋友同家長。

我地係有責任做正確的事,為良知,為香港未來,為下一代發聲 !!


====================================

我係一個媽媽,一個普通到不能再普通既人,我經歷左, 生仔爭床位,搶奶粉, 爭公屋, 返學爭學位, 樓價高得高攀不起,依然要為生存而生存既香港人。我不再年輕,但我也年輕過……年輕人都係想要機會啫⋯⋯
致唔認同近日年青人行為嘅大家,特別係收成期嘅人:
點解年輕人要搞事
當你係佢地嘅年紀時,
申請公屋只要幾年就有,
而家,申請公屋,單身由18歲排到50歲都未上到樓,而同時間新移民可以極速上樓
而你,問佢地點解要搞事
當你係佢地嘅年紀時,
一年有過萬居屋供應,一年可以抽幾次,中簽機會唔低,私樓亦唔係遙不可及
而家,一年一次抽居屋,得三幾千個單位,幾十萬人爭,仲難中過六合彩,私樓更加係絕望,除非你有父幹
而你,問佢地點解要搞事
當你係佢地嘅年紀時,
政府正在將市民由木屋,臨屋帶上公屋,居屋
而家,政府話年輕人冇屋住,可以住橋底水管屋或者官民合辦嘅劏房
而你,問佢地點解要搞事
當你係佢地嘅年紀時,
雖然未至於想買樓就買樓,但要解決居住問題都唔算難,有租務管制,租都租得起,再加各種置業資助計劃,冇幾多人會因為住屋問題而冇得結婚
而家,大把年輕人拍十年拖都唔敢結婚,就算結左分 (婚) 都要分開住,就係因為屋貴到租唔起買唔起
而你,問佢地點解要搞事
當你係佢地嘅年紀時,
大學畢業起薪萬幾,食個早餐十幾蚊,
而家,大學畢業起薪都係萬幾,但食個早餐係三四十蚊。
而你,問佢地點解要搞事
當你係佢地嘅年紀時,
一個人做嘢可以養一家幾口
而家,兩口子做嘢都唔知夠唔夠養家
而你,問佢地點解要搞事
當你係佢地嘅年紀時,
撞正移民潮,做三幾年野就有得升職人工翻幾翻,公務員冇人想做
而家,個個年輕人志願都係政府工,如果唔係,私人工隨時做十年人工都係多三幾千
而你,問佢地點解要搞事
當你係佢地嘅年紀時,
公園真係公園,營地真係營地,冇錢去旅行,放假拍拖去行下公園露下營都可以享受寧靜
而家,公園係大媽跳老舞揾生意嘅地方,營地就係中國人嘅免費酒店,仲嘈過旺角
而你,問佢地點解要搞事
當你係佢地嘅年紀時,
政府係鼓勵建設香港,為香港出一分力,成個香港朝氣勃勃
而家,政府係不斷叫年輕人去大灣区,香港冇前途架喇,但同時又不斷放中國人落黎
而你,問佢地點解要搞事
當你係佢地嘅年紀時,
唔會有官二代富二代同你講成功需苦幹,因為當時苦幹的確會有出路
而家,劉鳴煒之流最鐘意同年輕人講去少次日本就買到樓,但去少一次日本都追唔到樓價一個月升幅
而你,問佢地點解要搞事
當你係佢地嘅年紀時,
民意能夠直達政府,建制泛民都可以響政府各部門佔一位置,更加唔會動輒被DQ
而家,連監警會都容不下一個中間派,莫講話政府內部,議會就早已失效,政府議案絕對通過,議員議案就絕不通過
而你,問佢地點解要搞事
當你係佢地嘅年紀時,
政府就算要顧及法治,都會顧及民情,例如ICAC成立後特赦貪污警員,六七暴動後一邊拘控暴徒,但同時主動檢視治港政策,引入多樣惠民政策
而家,無論佔中後定反送中運動後,政府都只係強力打壓抗爭年輕人,判刑甚至比六七暴動更重,但政府絲毫冇檢討過自己嘅問題
而你,問佢地點解要搞事
當你係佢地嘅年紀時,
對住嘅係一個會重視人命嘅政府
而家,對住嘅係一個若蓮喪子嘅政府,係一個老師自殺因為唔捱得,學生自殺因為冇做好生涯規劃,年輕人死諫被完全無視嘅冷血政府
而你,問佢地點解要搞事
當你係佢地嘅年紀時,
港督夠膽單人匹馬落區食蛋撻,體察民情
而家,特首唔將方圓一公里封閉生人勿近都唔敢落區 
而你,問佢地點解要搞事
總括而言就係,
當你係佢地嘅年紀時,
香港到處都充滿希望活力
而家,香港對大部分年輕人都係絕望,日復日工作結果連安居樂業嘅微細願望都遙不可及
而你,問佢地點解要搞事
我敢講,假若而家呢一刻嘅你係佢地嘅年紀,
隨時你仲激進過佢地,
因為年輕人唔係搞事,只係想奪回以前美好嘅香港。
==============================================



沒有留言:

張貼留言